Брисел, 26 февруари 2025 (МИА) – Бактеријата Xylella fastidiosa, што ја предизвикува Пирсовата болест кај виновата лоза во Северна Америка, првпат е откриена кај грозје, бадеми и други растенијата во јужниот дел на италијанскиот регион Апулија, соопшти Европската агенција за безбедност на храната (ЕФСА).
Според најновиот извештај од базата на податоци за следење на ширењето на растителниот патоген Xylella fastidiosa, присуство на бактеријата првпат е утврдено и кај кантабрискиот планински даб Quercus orocantabrica во Португалија, но тоа не е прв случај на инфицираност во оваа земја.
– Вкупниот број на потврдени видови домаќини (на бактеријата) се зголеми на 452 видови од 70 различни ботанички семејства, се наведува во соопштението на ЕФСА.
Според агенцијата, врз основа на анализи на истражувања спроведени помеѓу јануари и јуни 2024 година, утврдено е дека ширум светот не е идентификуван ниту еден нов тип на секвенца на Xylella.
Xylella fastidiosa е бактериски патоген кој предизвикува сериозни заболувања кај широк спектар на растенија, вклучувајќи маслинови насади, јужно овошје, винова лоза и разни украсни растенија.
ЕФСА започна со следење на ширењето на Xylella fastidiosa од 2016 година на барање на Европската комисија, како дел од напорите за проценка на ризикот и справување со оваа бактерија.
Од Сашко Панајотов Извор МИА
