Ал-Хилал, клубот од Саудиска Арабија, направи неверојатна понуда од 400 милиони евра за младата фудбалска ѕвезда Ламин Јамал (18), но Барселона одлучи да го задржи овој талентиран играч. Според шпанскиот портал Фичахес, клубот од Каталонија ја одби најголемата понуда во историјата на фудбалот, бидејќи го гледаат Јамал како клучен играч и симбол на клубот во наредните десет години.
Ламин Јамал неодамна потпиша нов договор со Барселона, кој важи до 2031 година, со годишна плата од околу 10 милиони евра и бонус за потпишување од 25 милиони, кој ќе биде исплатен во следните шест години. Оваа одлука доаѓа во време кога Барселона се соочува со тешки моменти, по два последователни порази – од ПСЖ во Лигата на шампионите и од Севиља во Ла Лига.
Тренерот Ханси Флик наводно ги критикувал играчите за недостаток на вложен труд, а некои од нив, вклучувајќи го и Јамал, изразиле незадоволство поради лошата комуникација во тимот. Младата ѕвезда моментално се бори со воспаление на препоните, што го спречи да настапи на последниот натпревар во Ла Лига, како и во квалификациите за шпанската репрезентација против Грузија и Бугарија. Неговото учество во предстоечото каталонско дерби против Жирона, како и во Ел Класико на 26-ти октомври, е под знак прашалник.
