Вашингтон, 19 февруари 2025 (МИА) – Претседателот на САД Доналд Трамп изјави дека ќе ја блокира новинската агенција Асошиејтед прес (АП) од пристап до Овалниот кабинет и претседателскиот авион „Ер Форс 1“, сè додека агенцијата не престане да го користи називот „Мексикански Залив“.
Во јануари, Трамп потпиша указ со кој му наложи на Министерството за внатрешни работи да го смени името на водниот басен од „Мексикански Залив“ во „Американски Залив“. АП, повикувајќи се на своите уреднички стандарди, соопшти дека ќе продолжи да го користи традиционалното име.
Белата куќа минатата недела не ѝ дозволи на АП да присуствува на неколку прес-случувања, оценувајќи дека одлуката на агенцијата создава поделби и ширење на дезинформации.
– Ќе ги држиме надвор сè додека не се согласат дека ова е Американскиот Залив, изјави Трамп пред новинарите во неговиот имот „Мар-а-Лаго“ на Флорида.
АП потсетува дека терминот „Мексикански Залив“ се користи повеќе од 400 години. Како глобална медиумска агенција, таа соопшти дека ќе продолжи да го користи оригиналното име, но истовремено ќе го нотира и новото име кое Трамп го воведува.
Асоцијацијата на кореспонденти во Белата куќа, која ги застапува новинарите што известуваат за претседателот, протестираше против одлуката на администрацијата на Трамп за блокирање на АП.
Од Сања Костовска/МИА
