На азиските берзи, главните индекси се движат стабилно, а повеќето од нив се на или блиску до рекордни нивоа. Ова е резултат на очекувањата дека Федералните резерви на САД (ФЕД) ќе ја намалат каматната стапка во септември. Во меѓувреме, курсот на доларот продолжи да се намалува.
Индексот MSCI за акциите од азиско-пацифичкиот регион, без јапонските акции, бележеше благо зголемување и беше на пат да го достигне највисокото ниво од септември 2021 година. Ова го следеше позитивниот тренд од Волстрит, каде Nasdaq и S&P индексите достигнаа нови рекордни вредности. Индексот MSCI на глобалните акции, исто така, се задржа на рекордно ниво втор ден по ред.
Јапонскиот индекс Nikkei, сепак, забележа корекција по шест последователни дена на раст, во кои го проби историскиот праг од 43.000 поени. Индексите на берзите во Јужна Кореја и Тајван исто така ослабеа, додека кинеските берзи се движат благо нагоре.
Доларскиот индекс, кој ја мери вредноста на американската валута во однос на шест други главни светски валути, падна на најниско ниво во последните две недели, на 97,74 поени, што е намалување од 0,32% од претходниот ден. Ова се случи поради растечките очекувања дека ФЕД ќе ја намали каматната стапка за прв пат од минатиот декември.
Американскиот министер за финансии, Скот Бесент, истакна дека намалувањето може да изнесува половина процентен поен.
Курсот на еврото се зголеми за 0,18% во однос на доларот, достигнувајќи 1,17 долари, а јапонскиот јен се ојакна за 0,64%, на 146,41 јени за долар — највисоко ниво во последните три недели.
И покрај извештајот за инфлација од 2,7% во САД, кој го поддржува очекувањето за намалување на каматните стапки, некои аналитичари предупредуваат дека пазарот може да биде преголем оптимист. Тие посочуваат дека следните економски податоци може да ги изменат овие очекувања.
„Не сме толку сигурни дека ФЕД ќе ја намали каматната стапка за 25 базични поени во септември, а уште помалку за 50 базични поени, како што мислат финансиските пазари. Пред септемврискиот состанок, ќе има нов извештај за индексот на потрошувачки цени и бројките за вработеност, кои ќе ја потврдат или негираат можноста за намалување“, изјави Керол Конг, економист на Комонвелт Банката на Австралија.
Оптимизмот за поинаква монетарна политика ја поддржа и цената на криптовалутата биткоин, која достигна нов рекорд од 124.002,49 долари. Од почетокот на 2025 година, биткоинот порасна за 32%, додека втората по големина криптовалута, етереум, е порасната за 41% и сè уште е блиску до својот рекорд од ноември 2021 година.
