Жичницата на Водно, која ги поврзува скопјани и туристите со врвот на ридот и Милениумскиот крст, е безбедна и функционира во согласност со сите пропишани стандарди. Според информациите од Јавното сообраќајно претпријатие Скопје, жичницата има валиден безбедносен сертификат кој важи до 25 септември 2025 година.
Во моментов, жичницата е подложена на редовен сервис, кој се изведува овој месец. Од ЈСП Скопје истакнуваат дека е направен вонреден технички инспекциски надзор од Министерството за транспорт и врски, при што не се констатирани никакви технички недостатоци. „Жичницата е во исправна и функционална состојба“, велат од претпријатието.
Во одговор на шпекулациите во медиумите за можни проблеми со безбедноста, ЈСП Скопје нагласува дека е важно да не се создава паника. „По многуте пишувања и шпекулации во медиумите, должни сме да не дозволиме да се створи паника околу безбедноста на жичницата“, додаваат од ЈСП.
Сервисот вклучува замена на делови кои се дел од предвидениот годишен сервис, а по неговото завршување, граѓаните повторно ќе можат да уживаат во услугите на жичницата. „Ве известуваме дека безбедноста е по сите пропишани стандарди и по завршувањето на тековниот сервис, граѓаните повторно ќе го почувствуваат бенефитот од функционирањето на жичницата“, заклучуваат од ЈСП Скопје.
Иако жичницата е затворена за време на сервисот, информациите за нејзиното работење без дозвола, изнесени од Миќо Стојановски од синдикатот на ЈСП, предизвикаа дополнителни реакции во јавноста. Сепак, ЈСП Скопје останува уверено во безбедноста и исправноста на жичницата.
