Лондон, 14 мај 2025 (МИА) – Британската луксузна модна компанија „Барбери“ (Burberry) објави планови за намалување на потенцијални 1.700 работни места низ целиот свет, како дел од напорите за намалување на трошоците за персонал и враќање на луксузниот моден бренд во профит.
Предлозите ќе намалат околу 20 отсто од нејзината глобална работна сила. Компанијата соопшти дека ја зголемува својата цел за намалување на трошоците на 100 милиони фунти (133,4 милиони долари) заштеди годишно до финансиската 2027 година.
-Овие заштеди делумно ќе дојдат од намалување на „трошоците поврзани со луѓето“, соопшти фирмата, што би можело да влијае на околу 1.700 работни места низ целиот свет во текот на двегодишната програма.
Главниот извршен директор на „Барбери“, Џошуа Шулман, рече дека поголемиот дел од намалувањата ќе дојдат од тимовите со седиште во нејзините главни канцеларии низ целиот свет. Тие „природно“ би биле фокусирани во Велика Британија, каде што има поголем дел од вработените.
Шулман, исто така, потврди дека компанијата предложила укинување на ноќната смена во својата фабрика во Каслфорд, каде што се произведуваат палта на Барбери, кои се продаваат од околу 1.000 до 10.000 фунти по парче.
Предлозите ќе резултираат со намалување на околу 25 проценти од работните места на компанијата во Велика Британија.
-Ја правиме оваа промена за да го заштитиме нашето производство во Велика Британија и всушност ќе направиме значителна инвестиција за реновирање на оваа фабрика во втората половина. Нашата намера е да ги произведуваме нашите британски мантили од наследството во Велика Британија за многу идни генерации, рече тој.
Британскиот бренд откри дека имал оперативна загуба од три милиони фунти во годината до 29 март, што е значително пониско од профитот од 418 милиони фунти претходната година.
Од Марија Спасовска Извор МИА
