Компанијата Cupra официјално потврди дека го одложува планираното проширување на американскиот пазар, кое првично беше предвидено да се реализира во наредните пет години.
Причините за оваа одлука, според соопштението на брендот, се „континуираните предизвици во автомобилската индустрија“ и „променливата динамика на пазарот“. Иако не беа објавени повеќе детали, очигледно е дека состојбата со електричните возила во САД и новите увозни царини за европски автомобили имаат силно влијание врз оваа стратегиска промена.
Според новиот трговски договор меѓу САД и ЕУ, автомобилите од Европа ќе се соочат со царини од 15%, за разлика од претходните 2,5%, што значително ја зголемува цената на извозот. Дополнително, за возила произведени во Мексико – каде што се размислуваше да се лоцира дел од производството – царините достигнуваат дури 30%.
Одложена, но не и откажана стратегија
Cupra претходно планираше влез на американскиот пазар со два електрични SUV модели – наследник на актуелниот Formentor и еден поголем електричен кросовер. Поголемиот модел требаше да се произведува во фабрика на Volkswagen Group во Северна Америка или евентуално во Мексико.
И покрај одложувањето, компанијата истакнува дека не се откажува целосно од плановите за Северна Америка. „Не запираме, туку само го одложуваме нашето лансирање во САД“, изјави Свен Шувирт, извршен потпретседател за продажба, маркетинг и постпродажба во SEAT, матичната компанија на Cupra. Тој додаде дека Cupra ќе продолжи внимателно да го следи пазарот во наредните години, за да го утврди најдобриот тајминг и пристап, во согласност со долгорочната визија на брендот.
Силен раст на глобалните испораки
И покрај одложувањето на американската експанзија, Cupra бележи силен глобален раст. Во првата половина од 2025 година, испораките пораснале за 33,4% и достигнале 167.600 возила. Најпродаван модел останува Formentor со 54.700 испорачани единици.
Овој раст укажува на се поголемата популарност на брендот во Европа и други пазари, но американската авантура, засега, ќе мора да почека.
