Црна Гора денеска го одбележува Денот на жалост поради трагичната загуба на припадникот на Армијата, водникот Дејан Божовиќ, кој го загуби животот при гаснење на пожар во селото Кучи, кај Подгорица.
Пожарите продолжуваат да беснеат во подрачјата на Подгорица и Тузи, при што најкритична беше ситуацијата во селата Мрке, Петровиќи и населбата Диноша. Противпожарните екипи, волонтери и други служби цела ноќ се бореа со огнената стихија, спасувајќи куќи и штитејќи животи. Во Тузи, една куќа била сериозно загрозена, додека во Пипери и Кучи, каде вчера изгореа неколку куќи и објекти, пожарот е ставен под контрола.
Според првичните информации, постои сомневање дека пожарот во Кучи бил предизвикан од 14-годишно дете, а властите веќе користат дронови за да откријат евентуални други намерни подметнувања.
Во борбата со пожарите се повредени двајца пожарникари – едниот со повреда на окото, а другиот со изгореници на раката.
Црногорската влада потврди дека 14 август е прогласен за Ден на жалост во чест на водникот Божовиќ, кој животот го загуби херојски извршувајќи ја својата должност.
Во гаснењето активно се вклучија и меѓународни сили. Помош пристигна од Хрватска, Србија, Унгарија и Босна и Херцеговина. Хрватски канадер извршил 10 налети и испуштил 70 тони вода, српски хеликоптер 60 налети со 210 тони, унгарски хеликоптер 12 налети со 36 тони вода, а дополнително пристигна и хеликоптер од БиХ. Се очекува и пристигнување на пожарникарска екипа од Австрија.
Црна Гора се соочува со едни од најтешките пожари ова лето, а надлежните институции остануваат во состојба на целосна мобилизација додека трае борбата со огнот.
