Политичката партија Демократи остро реагираше на политиките на Министерството за одбрана во однос на родовата еднаквост, оценувајќи дека во Армијата на Република Македонија постои сериозна нееднаквост меѓу жените и мажите, и тоа во сите категории на вработени – од професионални војници до офицери и цивилни лица.
„Во Министерството за одбрана и во Армијата не постои родова еднаквост, туку само родова нееднаквост. На хартија можете да славите резолуции уште 125 години, но во реалноста има само нееднаквост, впишана и потврдена на хартија“, стои во реакцијата на партијата.
Од Демократи посочуваат дека жените во Армијата и натаму се жртви на дискриминација и нерамноправен третман, без разлика на нивниот чин или работно место. Според нив, нееднаквоста е системска и се протега и во делот на пензиските права, каде што, како што велат, постои очигледен двоен аршин.
„Жените вработени во Министерството за одбрана како цивилни лица заминуваат во пензија со 35 години стаж, додека жените во Армијата – офицери, подофицери и цивилни лица – одат во пензија со 38 години стаж. Дали носењето униформа, чизми и оружје е помалку вредно од носењето сукња, штикли и пенкало?“ прашуваат од партијата.
Демократи додаваат дека министерот за одбрана не е свесен за вистинската состојба во институцијата или, како што велат, „едноставно така му одговара“. Според нив, постојат бројни случаи на дискриминација и игнорирање на родовите разлики, кои со години не се решаваат.
„Наместо да се слави родовата еднаквост на хартија, потребни се вистински мерки што ќе обезбедат еднакви услови, права и можности за сите жени во системот на одбраната“, порачуваат од партијата, најавувајќи дека ќе продолжат да ја следат состојбата и да укажуваат на неправдите во институциите.
