Интервју со Давид Златанов – активист и носител на советничка листа за Општина Ново Село.
1. На претстојните избори ќе настапите како носител на листа за членови на Советот на Ново Село – што е она што Ве мотивираше да настапите на овие избори?
ДЗ: Мојата главна мотивација е мојата љубов кон крајот и луѓето што живеат тука. Во изминатите години сум бил активен преку граѓански организации и иницијативи како „Ја Штитам Беласица“, каде што заедно со многу млади и активни граѓани се боревме за чиста животна средина, зачувување на културното наследство и здравата иднина на нашата општина. Сметам дека дојде време таа борба да се префрли и во институциите, зашто само така може да се обезбеди трајна промена и вистинска корист за граѓаните.
2. Веќе години наназад сте активист кој меѓудругото активно работи на заштита на природата. Дали сметате дека вашето влијание ќе биде поголемо како дел од Советот на Ново Село?
ДЗ: Да, апсолутно. Како активист можеш да алармираш, да протестираш, да подигаш свест и да создаваш притисок, но многу често институциите остануваат глуви. Како дел од Советот ќе можам да предложам конкретни мерки – од поставување на мерни станици за загадување на воздух, вода и почва, до систематски програми за управување со отпад и развој на еко-туризам. Моето влијание ќе биде институционализирано, со можност да се донесат одлуки кои имаат реален ефект и законска сила.
3. За жал и Општина Ново Село се соочува со големи проблеми во поглед на миграцијата и иселувањето. Што е она што сметате дека е клучно да се направи за задржување на младите во населените села во оваа општина?
ДЗ: Клучот е економски развој и создавање перспективи. Младите не си одат затоа што не го сакаат своето место, туку затоа што немаат можности и верба во системот. Си заминуваат поради корупцијата, поради лошото здравство, партизираното школство и чувството дека сè функционира за мал број привилегирани. Ние мора да стимулираме локално претприемништво, да поддржиме мали и средни бизниси, особено во земјоделството и туризмот, да развиеме спортска и културна инфраструктура. Верувам дека Ново Село има огромен потенцијал – од планината Беласица и културното наследство, до традицијата во земјоделството. Ако тоа го претвориме во економска можност и го исчистиме системот од корупција, младите ќе останат тука.
4. Што е она што сметате дека треба најитно да се направи за Ново Село?
ДЗ: Најитно мора да се справиме со проблемот со отпадот и загадувањето, бидејќи тоа е директна закана за здравјето на граѓаните. Во исто време, потребни се мерки за инфраструктура – подобри патишта, подобра улична осветленост, јавни простори за младите и за семејствата. Но, и најважно – мора да воведеме транспарентност и отчетност во работата на Општината, за да знае секој граѓанин каде и како се трошат неговите пари.
5. Која е Вашата визија за Ново Село?
ДЗ: Ја гледам нашата општина како зелено, чисто и развиено место, каде што секој жител ќе се гордее што живее тука. Ново Село треба да стане пример за тоа како може да се комбинираат економскиот развој и заштитата на природата, како може да се поттикне младината, да се зачува традицијата и истовремено да се создаде модерна и просперитетна општина. Моја визија е Ново Село да биде симбол на правда, транспарентност и развој – општина каде што луѓето нема да размислуваат да си заминат, туку ќе сакаат да останат и да градат иднина.
