Движењето Демократи со остра реакција ги обвини „криминалните политички здруженија“ ДПМНЕ, СДС, ДУИ, ВЛЕН и ЗНАМ за катастрофалната состојба со демографијата во Македонија. Според нив, дивеењето на овие партии довело до масовно иселување на младите и драматично намалување на наталитетот, што, како што велат, го доведува во прашање и самото постоење на македонската држава.
Премиерот Христијан Мицкоски, на настан организиран од УНФПА за демографските трендови, изјави дека во 2024 година во Македонија се родиле едвај 16.000 новороденчиња, додека во 1950 бројката изнесувала околу 50.000. Тој предупреди дека во моментов во земјата живеат најмногу 1,5 милиони жители, а за 20 до 25 години таа бројка може да падне под еден милион. „Тоа значи колапс на пензискиот и здравствениот фонд, бидејќи еден вработен ќе издржува еден пензионер,“ нагласи Мицкоски.
Вицепремиерот Александар Николоски додаде дека владата планира да го намали иселувањето на младите со стимулирање на изградба на куќи по поприфатливи услови, намалување на надоместоците за комуналии и активна поддршка на локални инфраструктурни проекти во помалите средини.
Од Демократи, пак, тврдат дека овие мерки се задоцнети и дека причината за демографската катастрофа е токму „тоталната негрижа“ на владејачките партии кои, наместо да работат во интерес на граѓаните, се занимаваат со криминал и партиски зделки.
„Ако ова продолжи, за 10 до 20 години ќе се доведе во прашање самото постоење на македонската држава. За да го спречиме уништувањето мораме да ги симнеме од власт овие злосторнички банди,“ порачуваат од Демократи, повикувајќи ги граѓаните на локалните избори на 19 октомври да заокружат број 29.
