Политичката партија Демократи со осуда и длабока загриженост реагираше по двојното убиство во Велес, во кое животите ги загубија Росица и нејзиниот татко. Од партијата велат дека овој трагичен настан е уште едно потсетување на системските пропусти и институционалната негрижа, кои резултираат со тоа жените да остануваат без заштита и поддршка.
„Жените не смеат да живеат во страв – тие мора да имаат загарантирана безбедност и достоинствен живот во општеството,“ се вели во реакцијата.
Демократи го осудуваат секој облик на насилство, а особено семејното, и упатуваат апел за заедничка и решителна акција на институциите и целото општество во заштита и превенција на жените. Партијата нагласува дека фемицидот е најтежок и најсвиреп облик на насилство, кој мора да биде третиран со најголема сериозност и итност.
Во таа насока, тие повикуваат на измени на Кривичниот законик со кои сторителите на вакви дела нема да можат да бидат амнестирани, навремено и соодветно постапување на МВР, Центрите за социјална работа, Судството и Обвинителството, отворање нови и зајакнување на постоечките кризни центри, обезбедување 24/7 телефонски линии за помош и поддршка на жртвите, редовна едукација на службените лица и санкционирање за непостапување, како и програми за превенција и едукација во училиштата и локалните заедници.
Дополнително, партијата бара обезбедување долгорочна психосоцијална и правна поддршка за жртвите на насилство.
„Жените мора да имаат загарантирана безбедност и достоинствен живот – тоа е обврска на институциите, но и заедничка одговорност на целото општество,“ порачуваат Демократи.
