Православните христијани денес, 21 ноември, го одбележуваат празникот Свети Архангел Михаил – еден од најзначајните и најчесто славени празници во македонската традиција. Со овој ден именден го празнуваат сите што го носат името Михаил, Михаила, Миле, Милена, Ангел, Ангеле, Ангелина, Михо, Рајко, Рајна и уште многу други имиња поврзани со ангелската символика.
Според христијанското предание, Архангел Михаил е предводник на небесните сили, познат како заштитник, чувар и борец против злото. Црковните текстови наведуваат дека тој застанал на чело на добрите ангели во моментот кога Луцифер се спротивставил на Бога. Оттаму потекнува претставата за него како силен војвода со меч, која е најчесто присутна на иконите и фреските.
Во народната традиција, Архангел Михаил се смета за ангел кој ги води душите на луѓето до „оној свет“, но и како заштитник на болните. Постојат бројни преданија што зборуваат за чудесни исцелувања и помош во моменти на тешки болести. Една од познатите приказни е за момчето Василиј Карастирис, кое по тешка повреда било оперирано токму на 21 ноември – денот на Архангел Михаил – и по операцијата целосно оздравило, што верниците го поврзуваат со неговото заздравување.
Благодарение на ова силно духовно и народно значење, Св. Архангел Михаил е една од најраспространетите слави меѓу македонскиот народ. Во црквите денес има богослужби, а многу семејства го одбележуваат празникот дома, со традиционален обред, молитва и собирање со најблиските.
