Во Скопје, Движењето ЗНАМ – за наша Македонија одржа промотивна конвенција, на која беа претставени кандидатите за градоначалници и советничките листи. На настанот, Максим Димитриевски, кандидат за градоначалник на Општина Куманово, и Мирослав Лабудовиќ, кандидат за Општина Центар, ја презентираа својата визија за иднината на општините. Димитриевски изрази уверување дека ЗНАМ ќе победи уште во првиот круг на изборите, истакнувајќи дека знае што им е потребно на кумановчани и каков градоначалник сакаат.
Тој потенцираше дека ЗНАМ не влегува во изборниот процес за да се натпреварува, туку за да победи. “Во 53 општини на овие избори ќе имаме свои претставници. Ние сме нова и млада политичка партија која созрева од ден на ден и нашето време допрва доаѓа. ЗНАМ делува со агенда, план и концепт. На врвот на нашата агенда е просперитетна, подобра и посилна Македонија,” рече Димитриевски.
Тој истакна дека Куманово е променето во изминатите осум години и дека ќе продолжи да се развива со помош на граѓаните и локалната власт. “Успеавме од една општина која што беше најголем загубар, да стане финансиски најстабилна во државата. Во изминатите години реализиравме повеќе од 800 проекти за нашето Куманово,” додаде тој.
Во однос на предлог резолуцијата со црвени линии од СДСМ, Димитриевски изрази критика, велејќи: “На СДСМ пред избори им текна да предложат резолуција со црвени линии. Сега им текна на македонските црвени линии, а кога беа на власт ги распродаваа нашите национални интереси.” Тој нагласи дека ЗНАМ ќе продолжи да ги штити националните интереси на Македонија.
Димитриевски се осврна и на изјавата на Али Ахмети, претседателот на ДУИ, за можните последици од евентуално скршнување од патот кон Европската Унија. “Деновиве предизборно повторно се јави уште еден политички лик кој нанесе голема штета на Македонија. Го слушам Ахмети како се расфрла со приказни за мали деца, за некакви поделби на Македонија. Ах, бе Ахмети, се додека има Македонци, ќе ја има и Македонија,” заклучи Димитриевски.
