Познатиот производител на батерии, Duracell, кој е препознатлив по своите реклами со анимираниот зајак, најави нова иницијатива – изградба на станици за полнење електрични автомобили. Компанијата планира да инвестира 240 милиони евра во нова мрежа на брзи полначи во Велика Британија. Новата компанија која ќе управува со оваа мрежа ќе се вика Duracell E-Charge.
Целта е да се воспостават 100 станици со најмалку 500 места за полнење до 2030 година. Очекувањата се дека првите станици со препознатливиот бакарно-црн дизајн ќе бидат отворени веќе оваа година. Полначите ќе имаат моќност до 400 kW, што ги става во самиот врв на брзите полначи. Компанијата исто така ветува лесен и кориснички прилагоден интерфејс.
Ова огромно вложување на Duracell доаѓа во време на актуелни предизвици на британскиот пазар, каде што многу оператори се соочуваат со длабока криза. Во Англија, фиксните такси за поврзување на електричната мрежа пораснаа за дури 462 проценти за само две години, што значи дека управувањето со јавните полначи е оптоварено со големи трошоци.
