Вашингтон, 23 април 2025 (МИА) – Федерален судија и нареди на администрацијата на претседателот Доналд Трамп да го врати Гласот на Америка, велејќи дека со напорите за уништување на 80-годишниот информативен сервис финансиран од владата веројатно се прекршени и законот и Уставот.
Според Политико, американскиот окружен судија Ројс Ламберт рече дека брзањето на администрацијата да го распушти Гласот на Америка (VOA) и сродните новински организации финансирани од Американската агенција за глобални медиуми (USAGM) резултираше со суспензија на стотици новинари и вработени.
„Ова доведе до опасност некои странски дописници да бидат депортирани во нивните матични земји, а замолчувањето на Гласот на Америка – за првпат по 80 години – исто така лиши стотици милиони слушатели од сигурен извор на вести во делови од светот кои немаат слободни медиуми“, рече Ламберт.
Тој, исто така, рече дека администрацијата практично не понудила никакво оправдување за драконските намалувања, сугерирајќи дека работи на усогласување со извршната наредба на претседателот Доналд Трамп од 14 март, која повикува на значителни намалувања на агенцијата.
„Сепак, намалувањата беа толку длабоки што веројатно ја прекршиле дури и наредбата на Трамп програмите да продолжат да функционираат со законски задолжителни минимални нивоа на услуга“, додаде судијата Ламберт.
Судијата, кој беше назначен од Реган, и нареди на администрацијата на Трамп веднаш да ги врати сите вработени и програмата на Гласот на Америка за да го исполнат законскиот мандат да „служат како постојан сигурен и авторитетен извор на вести“.
Трамп и неговите сојузници го осудија Гласот на Америка како бастион на идеологијата на „крајната левица“ и посочија дека тоа не им служи на интересите на американската влада.
Од Пандорка Арсовска-Гацова
