Братислава, 22 јануари 2025 (МИА) – Словачкиот премиер Роберт Фицо денеска изјави дека група странски „експерти“ кои учествувале во немирите во Грузија и на Мајдан работат во Словачка со цел да ја соборат актуелната влада.
Тој ова го изјави на прес-конференција во врска со протестите на опозицијата во таа земја против актуелната власт и додаде дека групата е под надзор и е финансирана од САД, пренесува словачкиот портал Правда.
„Словачката опозиција се подготвува за Мајдан и окупација на владини згради“, рече Фицо, додавајќи дека за ова прашање за четврток свикал седница на Советот за национална безбедност.
Претходно, Фицо се сретна со словачкиот претседател Петер Пелегрини и со шефот на Словачката разузнавачка служба (СИС) Павле Гашпар, како и со претставници на други државни сили во врска со извештајот на СИС во кој се наведува дека службата има информации за организирано странско влијание за дестабилизација на Словачка.
„Во нормална демократска држава под владеење на правото, безбедносните сили ќе интервенираат бидејќи тоа е кршење на законот, дури во некои случаи и прекршување на кривичното право“, рече тој во врска со протестите на опозицијата, додавајќи дека „сите телевизии во светот“ би се собрале и би создале слика за тоа како интервенира полицијата, како и дека ќе дојде до масовни протести и преземање на власта во државата.
Фицо истакна дека ги почитува правата на граѓаните кои можат да се собираат, но дека државата не може да толерира кршење на законите.
Според него, на седницата на Советот за национална безбедност ќе се расправа за превентивни мерки за спречување ескалација.
Опозицијата извештајот на СИС го нарече апсурден, а наводите во извештајот ги негираат и организаторите на протестот.
Од Пандорка Арсовска-Гацова/МИА
