Трговијата во согласност со правилата на Светската трговска организација (СТО) е на најниско ниво од крајот на Втората светска војна, предупреди генералната директорка Нгози Окоњо. Во текот на оваа година, американскиот претседател Доналд Трамп воведе високи царини на бројни трговски партнери, што предизвика серија реакции и зголеми тензиите во трговските односи, пренесува агенцијата Мина.
Во вакви услови, уделот на трговијата која се придржува на правилата на СТО опадна од 80% на 72%, што е најниска вредност од крајот на Втората светска војна. Според СТО, меѓународниот трговски систем се базира на принципот на „најповластена нација“, што значи дека најдобриот пристап до пазарот на одредена земја треба автоматски да се применува на сите останати.
„Се наоѓаме во период на најголеми нарушувања во глобалните трговски правила во последните 80 години“, изјави Нгози Окоњо за Reuters во интервју на почетокот на својот втор мандат на чело на СТО. Таа додаде дека не е изненадувачки што некои луѓе го доведуваат во прашање глобалниот трговски систем.
Во следната година, последиците од овие нарушувања би можеле да станат поизразени, бидејќи таласот на нарачки од првата половина на годината опаѓа. На почетокот на август, СТО ја зголеми проценката за растот на светската трговија за оваа година од 0,2% на 0,9%, истакнувајќи ги подобрените макроекономски услови и зголемените нарачки од американските компании кои се обидуваат да се подготват за најавените царини. Прогнозата за следната година е намалена од 2,5% на 1,8%.
