Извозот и увозот на Република Македонија забележуваат натамошен пораст во периодот јануари – октомври 2025 година, покажуваат најновите претходни податоци за надворешнотрговската размена. Анализата укажува на стабилна динамика во трговските текови, со забрзување на увозот и умерен раст на извозната активности.
Според податоците, вкупниот извоз во првите десет месеци од 2025 година достигнал 413.102 милиони денари, што претставува зголемување од 2,26 проценти во споредба со истиот период во 2024 година. Увозот, пак, бележи посилен интензитет – неговата вредност изнесува 589.092,3 милиони денари, што е 4,16 проценти повеќе од минатата година.
Структура на размената по производи
Анализата според Стандардната меѓународна трговска класификација го покажува следното:
Најзастапени извозни производи:
- катализатори на носачи со благородни метали и нивни соединенија,
- сетови на проводници за палење и други компоненти за автомобили, авиони и бродови,
- делови од седишта (подгрупа 821.1),
- други видови катализатори на носачи.
Овие производи и понатаму го задржуваат приматот во технолошки ориентираниот извоз, кој во последната деценија е движечка сила на македонската надворешна трговија.
Најзначајни увозни категории:
- нафтени масла и масла од битуменозни минерали (освен сурови),
- платина, легури на платина и други метали од платинската група,
- необработени метали во прав или друга сурова форма,
- моторни возила за транспорт на лица.
Забележлив е растот на увозот на енергенси и возила, што често корелира со зголемената економска активност и домашната побарувачка.
Каде најмногу тргува Македонија?
Во периодот јануари – октомври 2025 година, Северна Македонија најинтензивно тргувала со Германија, Велика Британија, Кина, Грција и Србија. Овие пет партнерски економии учествуваат со значајни 47,6 проценти во вкупниот обем на размената.
Земјите од Европската Унија остануваат доминантен трговски партнер, со 59,4 проценти учество во вкупниот надворешнотрговски промет.
