По повод 3-ти Декември – Меѓународниот ден на лицата со попреченост, градоначалникот Сашко Митовски, заедно со стручните лица од Општината, оствари топла и искрена средба со штитениците и вработените во Дневниот центар за лица со интелектуална и телесна попреченост. Во атмосфера исполнета со радост, искреност и човечност, тој им го честиташе празникот и им ги врачи овогодинашните подароци од локалната самоуправа, подготвени согласно нивните реални потреби и желби.
Како дел од програмска мерка за 2025 година – доделување ваучери за набавка на гардероба за лица со попреченост, Општината обезбеди нови пакети со облека, кои штитениците денес ги примија со видлива возбуда и благодарност. Општинската организација на Црвениот крст од Крива Паланка, како долгогодишен партнер и соработник на локалната самоуправа, ја спроведе целосната законска постапка за избор на фирма и распределба на ваучерите до корисниците.
Во рамки на одбележувањето на овој значаен ден, градоначалникот Митовски организираше и традиционален свечен ручек за штитениците и вработените од Одделението за дневен престој, додавајќи уште една нота на внимание и искрена посветеност.
Денот беше исполнет со радост, заедништво и топла и другарска атмосфера, искрени насмевки и моментите кои потсетуваат дека поддршката, разбирањето и прифаќањето се основа на секое хумано општество. Штитениците со исклучителна радост и возбуда ги примија подароците, а нивната благодарност уште еднаш ја потврди важноста на овие заеднички моменти и гестови на внимание.
„На Меѓународниот ден на лицата со попреченост, кој во својата суштина повикува на надминување на предрасудите, маргинализацијата и дискриминацијата, сакам да потенцирам дека искрено сум почестен и секогаш среќен кога сум со овие прекрасни лица, кои се нераскинлив дела од нашата заедница. Тие за мене секогаш се на прво место и во мене имаат вистински другар, поддршка и партнер. За нив, Општината и јас како градоначалник, сме секогаш отворени и достапни, за сè што им е потребно.“ – истакна градоначалникот Сашко Митовски, за време на ова топло и емотивно дружење.
Со ваквите активности, Општина Крива Паланка уште еднаш ја потврдува својата континуирана посветеност кон градење инклузивна заедница, каде секој граѓанин има свое заслужено место, внимание и поддршка.
