Дубаи е синоним за невидено раскошен живот – без разлика дали станува збор за станови, бутици, накит, ресторани, услуги или, секако, автомобили. Улиците на најпознатиот емират во Обединетите Арапски Емирати се преполни со луксузни возила, но истовремено и со авто отпади полни со најскапите модели во светот.
Познатиот Јутјубер Лари Чен неодамна објави видео-репортажа од еден од најскапите авто-отпади на светот, лоциран во близина на Дубаи. Таму можат да се најдат некои од најредоките и најлуксузни суперавтомобили во светот – вистински „гробишта“ за возила кои некогаш чинеле милиони.
Особено е интересно тоа што многу од овие автомобили не се оштетени – тие се едноставно напуштени. Карбонски делови, керамички и титаниумски компоненти денес наоѓаат нови сопственици ширум светот, пренесува Jutarnji.hr.
Дубајските отпади се полни со легендарни марки: Lamborghini, Ferrari, Lotus, McLaren, но и Bentley и Rolls Royce. Снимките од тие „дворови“ говорат сами за себе – луксузот завршува на отпад.
Покрај можноста за купување возила на лицитација или од авто-отпад, во Дубаи постои и пазар за напуштени автомобили. Се проценува дека секоја година од 2.000 до 3.000 возила се напуштаат од нивните сопственици, често странци кои го напуштаат емиратот без да ги подмират сите долгови или казни.
Во такви случаи, дубајската полиција ги собира возилата и ги става на јавна лицитација. Постојат и специјализирани компании кои се занимаваат со ваков вид продажби и често соработуваат со локалните власти за организација на аукциите.
Во светот на екстремен луксуз, дури и автомобилите со милионска вредност можат да завршат заборавени во пустината.
