Техеран, 26 мај 2025 (МИА) – Иран нема да разгледува привремено запирање на збогатувањето ураниум за да обезбеди нуклеарен договор со САД, изјави денеска портпаролот на Министерството за надворешни работи, додавајќи дека сè уште не е одреден датум за шестата рунда преговори со Вашингтон.
Вашингтон и Техеран се обидуваат да го решат деценискиот спор околу иранската нуклеарна програма.
– Иран никогаш нема да го прифати тоа, рече портпаролот Есмаил Багеј за запирањето на збогатувањето ураниум на три години за да се постигне договор.
Иран ќе преживее дури и ако нема преговори со САД и ако се применат дополнителни санкции, изјави денеска претседателот Масуд Пезешкијан, јавија државните медиуми.
– Нема да умреме од глад ако одбијат да преговараат со нас или да ни наметнат санкции. Ќе најдеме начин да преживееме, рекол иранскиот претседател.
Американскиот претседател Доналд Трамп вчера изјави дека американските преговарачи имале „многу добри“ разговори со иранската делегација за време на викендот.
– Ако постои добра волја од американска страна, и ние сме оптимисти, но ако разговорите се насочени кон ограничување на иранските права, тогаш разговорите нема да доведат никаде, додаде Багеј.
Од Јасмина Тасевска Извор МИА
