Германија ќе испрати десетина војници во Гренланд, потврди германското Министерство за одбрана. Станува збор за извидувачка мисија, која се реализира на покана на Данска, во чии рамки германските сили ќе учествуваат во активности поврзани со безбедносното присуство на Арктикот.
Распоредувањето доаѓа само неколку часа по неуспешниот самит за Гренланд во Вашингтон“, по што, според медиумските извештаи, првите европски специјални и извидувачки единици веќе пристигнале на терен.
Дански воен авион слетал на цивилниот аеродром во Нуук, по што дел од припадниците биле транспортирани со автобуси до Арктичкиот команден центар на данските вооружени сили. Во рамки на истата операција, во центарот пристигнале и дански и француски офицери и војници.
Според неофицијални информации, воени контингенти од Холандија, Канада, Шведска, Велика Британија и Норвешка исто така се на пат кон Гренланд, што укажува на поширока европска и трансатлантска координација.
Германските медиуми наведуваат дека операцијата е раководена директно од Копенхаген, а не преку командните структури на НАТО, што отвора дополнителни прашања за новите безбедносни аранжмани во арктичкиот регион.
