Ракометниот клуб Алкалоид испиша историја – македонскиот тим е новиот освојувач на ЕХФ Европскиот куп за мажи за сезоната 2024/25. Одлуката ја донесе Европската ракометна федерација (ЕХФ), откако АЕК Атина службено го загуби реваншот во Скопје, поради одлука да не излезат на натпреварот.
Грчкиот клуб не се појави на вториот финален натпревар откако македонските власти не дозволија влез за дел од нивните навивачи кои немаа дозвола да присуствуваат. Иако причината за откажувањето беше јасна, ЕХФ побара дополнителни изјаснувања од двата тима пред да донесе конечна одлука. По проценката, пехарот заслужено му беше доделен на Алкалоид – тимот кој не ја наруши спортската регуларност.
Во првиот финален натпревар, одигран во Атина, Алкалоид под водство на Кире Лазаров славеше со 25:29, што дополнително го поткрепи нивниот пат до титулата. ЕХФ го регистрираше службениот резултат од реваншот со 10:0 и 2:0 бода во корист на македонскиот тим.
И покрај успехот, остана горчлив вкус кај македонската публика, која беше подготвена да го слави трофејот во преполната сала „Борис Трајковски“, но славјето никогаш не се одржа.
Ова е прв европски трофеј за Алкалоид, а трет за македонски клуб во натпреварувањата под капата на ЕХФ, по Вардар и Металург. Со ова, Скопје повторно станува центар на европскиот ракомет.
