Македонскиот фолклорен ансамбл „Илинден“ при Македонската православна црковна општина „Свети Илија“ од Мисисага, Канада, освои прво место на Меѓународниот уметнички фестивал одржан во Лоре дел Мар, Шпанија, постигнувајќи историски успех како прв македонски ансамбл од Северна Америка што го добил ова признание.
Ансамблот се претстави со дел од сценската кореографија „Источна“, авторско дело на доајенот Тофе Дракулевски, а музиката, компонирана од Ѓорѓи Димчевски, доби највисоки оценки од меѓународното стручно жири. Изведбата ја воодушеви публиката и беше поздравена со бурни аплаузи.
Ансамблот е предводен од Марија Божиновска Цветанова, а кореографијата ја подготви Орхидеја Радевска. Тие активно работат на промоција и афирмација на македонската народна уметност не само во Канада, туку и на светската сцена.
По повод успехот, Светскиот Македонски Конгрес упати искрени честитки до ансамблот „Илинден“ за нивниот придонес во негувањето и афирмацијата на македонската култура и традиција на меѓународно ниво.
