Куманово, 7 август 2024 (МИА) – Изгаснат е пожарот на дабова шума во липковско Матејче, соопштија денеска од Регионалниот центар за управување со кризи Куманово и од кумановската подружница на „Национални шуми“. Пожарот на планината над село Матејче избувнал во попладневните часови.
– Наша екипа од пет вработени со едно противпожарно возило успеа да го изгаси пожарот кој зафати нискостеблеста дабова шума на површина од околу два хектари. Со брзата интервенција екипата успеа да го спречи ширењето на пожарот, изјави в.д. директорката на кумановската подружница, Катица Станковска Ристовска.
Пожарот е изгаснат за два и пол часа, од 18:00 до 20: 30 часот.
Пожарникарите од Куманово, пак, вчера интервенирале на запалена сува трева и стрниште во село Романовце, а гаснеле пожар и во село Љубодраг на земјоделска машина.
Од Александра Максимовска, Куманово Извор МИА
