Градоначалникот на Општина Карпош и кандидат на претстојните избори, Стевчо Јакимовски, ја истакна заглавеноста на проектот за изградба на мостот кон Злокуќани и Бардовци, кој веќе три години чека поради бирократија и неодговорност од страна на институциите. Според Јакимовски, овој проект ќе помогне во растоварување на сообраќајот, особено на кружниот тек на „8 Септември“ и булеварот „Илинден“, но е спречен од забавени конзерваторски работи и дозволи.
„Срамота е што мостот и улицата веќе одамна можеле да бидат готови, а денес се чекаат дозволи кои тапкаат во место“, истакна Јакимовски. Тој најави дека заедно со Александар Трајановски, идниот градоначалник на Скопје, ќе го завршат и пуштат мостот во употреба.
Покрај изградбата на мостот, Јакимовски најави и изградба на спортско-рекреативен комплекс во Карпош, кој ќе вклучува фудбалски, кошаркарски и одбојкарски терени, како и детско игралиште. Според него, ова ќе ја подобри инфраструктурата и ќе понуди нови можности за спорт и рекреација за сите граѓани.
„Карпош и Скопје заслужуваат современи инфраструктурни решенија, а иднината што ја градиме заедно се темели на мостови, спортски терени и зелени површини“, заврши Јакимовски.
Видеото можете да го погледнете ТУКА.
