Сеул, 2 септември 2024 (МИА) – Јужнокорејската полиција започна истрага за платформата „Телеграм”, со цел да провери дали апликацијата за криптирани пораки е вмешана во ширењето на сексуална содржина, пренесе Јонхап, повикувајќи се на Националната истражна служба.
Бирото за кибер истраги одби да даде коментар за случајот.
Истрагата започна поради јавната и политичка загриженост за дигиталната диипфејк порнографија со јужнокорејски жени. Според локалните медиуми, таква содржина често се наоѓа во групи на платформата „Телеграм”.
Минатата недела, јужнокорејските власти ветија дека ќе се борат против криминалот поврзан со сексуална експлоатација – што се совпадна со истрагата во Франција против Павел Дуров, рускиот основач на „Телеграм”, бидејќи властите таму го истражуваат учеството на организираниот криминал на платформата.
Националната истражна служба на Јужна Кореја коментира дека истрагите против платформите за сигурни пораки се сложени и одземаат многу време.
Минатата недела, компанијата изјави дека активно го модерира штетното содржина на својата платформа, вклучувајќи ја и порнографијата.
Јужна Кореја е најчеста цел на диипфејк порнографијата, при што нејзините пејачи и актерки сочинуваат 53 проценти од луѓето вклучени во такви обработени снимки, според извештајот за 2023 година за диипфејк на глобално ниво, изработен од компанијата Security Hero – американски стартап фокусиран на заштита од кражба на идентитет.
Јужнокорејската полиција соопшти дека бројот на случаи на диипфејк сексуални злосторства оваа година е 297. За споредба, во 2021 година, кога овие податоци првпат беа собрани, тие изнесуваа 156. Според полицијата, поголемиот дел од жртвите и извршителите на вакви злосторства се тинејџери.
Во прилог на барањето до сопствениците на социјалните мрежи и платформите за пораки да соработуваат поактивно при бришење и блокирање на таква содржина, јужнокорејскиот медиумски регулатор побара од француските власти редовна соработка по прашања поврзани со „Телеграм” и олеснување на директната комуникација со самата компанија.
Освен тоа, во петокот, јужнокорејската влада соопшти дека ќе инсистира на построги закони кои ќе го прогласат купувањето или гледањето на диипфејк снимки со сексуална експлоатација за кривично дело.
Од Сања Костовска Извор МИА
