Според новата студија, бојата на автомобилите може директно да влијае на температурата на воздухот околу нив. Тамните автомобили ја зголемуваат температурата во градовите, додека светлите автомобили ја рефлектираат сончевата светлост, што нуди едноставен начин за ладење на улиците.
„Кога поминувате покрај паркиран автомобил во жешок ден и чувствувате како зрачи топлина — тоа е реално, не е ваша имагинација“, изјави за „New Scientist“ Марсија Матијас од Универзитетот во Лисабон. Нејзиниот тим следел два автомобили, црн и бел, оставени на отворено повеќе од пет часа под ведро небо, додека температурата на воздухот била 36 степени Целзиусови. Црниот автомобил ја зголемил температурата на воздухот во близина за дури 3,8 степени во споредба со асфалтот, додека белиот автомобил не предизвикал значителна промена.
Зошто е важна бојата? Белата боја рефлектира 75–85 проценти од сончевата светлост, додека црната рефлектира само 5–10 проценти. Тенката челична или алуминиумска каросерија на автомобилот се загрева побрзо од дебелиот асфалт, што дополнително ја зголемува локалната температура. „Сега замислете илјадници автомобили паркирани по градот, од кои секој делува како мал извор на топлина или топлотен штит. Нивната боја всушност може да ја промени температурата на улиците“, објаснува Марсија Матијас, еден од авторите на студијата објавена во списанието „City and Environment Interactions“.
Како што се наведува, префарбувањето на темните автомобили во посветли нијанси би можело да ја зголеми рефлективноста на површините од 20 на скоро 40 проценти во области каде што паркираните автомобили заземаат повеќе од 10 проценти од коловозот.
