Со дерби натпреварот меѓу Вардар и Пелистер беше отворена новата сезона во Прва МФЛ, но битолчани потклекнаа на Националната арена во Скопје, иако одиграа рамноправно прво полувреме.
Невниманието на одбраната во судиското надополнување од првиот дел му донесе водство на Вардар, а на стартот од вториот дел, Роџерс Мато ја допре топката само колку да го смени нејзиниот правец, па Андреј Јовчевски повторно капитулираше.
„Резултатите од првото коло покажаа дека екипите кои играле во евро куповите се во извесна предност поради порано започнатите подготовки и подигнатата играчка форма. Вардар е една од нив и благодарение на тоа имаше поуспешна реализација, која се случи во критични моменти како судиско надополнување во првото полувреме и старт на вториот дел. Ние не ги искористивме нашите шанси, немавме завршница во транзициите, во спротивно можевме да му дадеме друг тек на дербито, кое мислам дека не ја разочара публиката“, вели тренерот на битолскиот клуб, Димитар Капинковски.
Според стратегот на битолчани и нивниот иден противник АП Брера имаше сличен натпревар како нивниот, каде што по изедначен старт, Силекс успеа да ја демолира струмичката екипа. За разлика од нив, Брера сега ќе биде домаќин, а Пелистер по втор пат ќе игра на гостински терен.
„Ждрепката сакаше во првите четири натпревари три пати да играме како гости. Брера исто како нас имаше дуел во кој играше со противник што отскокнува со својата форма, па резултатот сигурно не е одраз на вистинскиот капацитет на струмичани. Тие беа рамноправен противник се до моментот кога останаа без еден играч, а потоа паднаа во финишот. Мислам дека никој не влегува во овој натпревар како фаворит, па мечот може да биде решен од играч што ќе има свој ден или онаа екипа што ќе има повеќе среќа во реализацијата. Ние ќе пристапиме нормално, како кон секој друг натпревар. Нашата екипа е во создавање, но целта ни е што поскоро да влеземе во играчка форма и да се надигруваме, да освојуваме бодови. Очекувам позитивни резултати што поскоро, па со нетрпение ги исчекуваме и овој натпревар со Брера, но и следниот што ќе го играме под рефлектори на домашен терен со Шкупи“.
Мечот меѓу АП Брера и Пелистер е на програмата в понеделник од 17 часот, а резултатот се очекува да биде недвосмислен показател за тоа кој од двата тима може да фати приклучок кон горниот дел од табелата, а кој ќе биде препуштен на борбата за опстанок.
Извор/Фото:www.ffm.mk
