На 65. седница на Советот на Општина Карпош, одржана во амфитеатарот на Универзитетот во Скопје, беа разгледани и усвоени 22 точки од дневниот ред, со акцент на спортот, урбанизмот и поддршката за младите.
Летување и награди за најуспешните ученици и професори
Советот едногласно го поддржа предлогот за организирање наградно летување во детскиот камп „Каливас“ во Грција за победничките екипи во училишните спортски лиги во фудбал, кошарка и одбојка (девојчиња), како и за најуспешните индивидуални спортисти.
Дополнително, ќе бидат доделени и 19 парични награди за професори и ученици. Тројца професори ќе добијат по 8.000 денари за прво место, други тројца по 6.000 за второ и уште тројца по 5.000 денари за трето место. Десет ученици ќе добијат по 6.000 денари за индивидуални спортски достигнувања.
Финансиска поддршка за спорт и младински клубови
Советот го усвои новиот Правилник за еднократна финансиска поддршка за спорт и рекреација, со буџет од 1 милион денари. Клубовите без сениорски тимови, но со резултати во младински категории, ќе можат да добијат до 60.000 денари. Предвидени се и стипендии за талентирани ученици од VIII и IX одделение.
Нови услови за користење на спортските сали
Советниците го одобрија и новиот систем за користење на салите во спортскиот објект „Партизан“. Термините се дефинирани по времетраење од 75 минути, а цената варира од 1.300 до 2.400 денари, во зависност од времето на користење. Исто така, дадена е согласност за издавање под закуп на кафетерија и сала во „Партизан“, со почетна цена од 54.500 денари месечно.
Простор за здруженија и центар за лица со попреченост
Поддршка доби и предлогот за отстапување на просторија во салата „Партизан“ на здружението „Културно Ехо – Скопје“, како и отстапување на објект во Влае за отворање Дневен центар за лица со попреченост.
Урбанистички измени и суспензија на делови од ДУП
Советот го усвои Деталниот урбанистички план за Градска четврт З 09 и го задолжи Секторот за урбанизам да не издава акти за парцели со станбена намена додека не се добие мислење од Министерството за транспорт и врски за нивна суспензија. Дополнително беше усвоена и точката за продажба на државно земјиште во Карпош 2 на кое ќе треба да се изгради катна гаража.
Технолошки унапредувања и буџетски извештај
Одобрени се и 400.000 денари за набавка на софтвер за транскрипција на седниците на Советот. Усвоен е и кварталниот буџетски извештај за 2025 година, според кој во првиот квартал се реализирани приходи од 361 милион денари од планирани 1,58 милијарди.
Поддршка за рециклирање и екологија
Советот даде согласност за доделување канти за селекција на отпад од 120 литри за домаќинствата во Карпош преку јавен повик.
