Градоначалникот на Тетово и лидер на Движењето Беса, Билал Касами, изјави дека Арбен Таравари ќе остане министер во Владата уште неколку дена. Според него, веќе се договорени конкретни активности со премиерот кои ќе бидат спроведени во наредниот период.
„Се договоривме за тајмингот на активностите што треба да се преземат во наредните денови. Она што е важно е дека нема соработка со ДУИ и Владата. Ова го договоривме со премиерот и, се разбира, ќе има конкретни чекори наскоро“, изјави Касами.
Тој уште еднаш потврди дека, според ставот на Беса, во Владата нема место за лица или политички субјекти кои соработувале или сè уште соработуваат со Демократската унија за интеграција (ДУИ).
Од ВМРО-ДПМНЕ, партијата која го предводи парламентарното мнозинство, велат дека нема да има нарушување на стабилноста на владината коалиција. Според нив, парламентарното мнозинство останува стабилно и не се очекува загрозување на бадентеровото мнозинство.
Во јавноста сè почесто се спомнува можноста Арбен Таравари да биде заменет со Зијадин Села како дел од реконструкцијата на владата, но од ВМРО-ДПМНЕ велат дека засега таквото сценарио е „високо хипотетичко и шпекулативно“.
