Граѓанската иницијатива „Зелен хуман град“ алармира дека во следниот период ќе се исечат 113 дрвја во Градскиот парк во Скопје, врз основа на решение издадено од Секторот за комунални работи на Град Скопје, објавено пред 30 дена. Според нивните информации, сечата е административно одобрена, но не и целосно оправдана.
Од иницијативата укажуваат дека дел од дрвјата на терен изгледаат здраво и не покажуваат знаци на болест или оштетување, поради што побарале од Градот детално мапирање на секое дрво што е предвидено за отстранување, како и објаснување за причините за нивното сечење.
„Иако е планирано засадување на 300 нови дрвја, не помлади од шест години, тие не можат да ја заменат еколошката и климатската вредност на децениските дрвја – ниту за сенка, ниту за производство на кислород, ниту за стабилност на екосистемот,“ велат од „Зелен хуман град“.
Организацијата додава дека секоја интервенција врз урбаното зеленило мора да се изведе со максимална претпазливост, особено во услови на сериозен недостаток на зелен простор во Скопје.
По разговори со надлежните, претставници од „Зелен хуман град“ добиле покана од Секторот за комунални работи да ги разгледаат извештаите од шумските инженери. За понеделник во 12:45 часот е најавена заедничка обиколка на Градскиот парк, при што ќе се направи увид на терен и ќе се даде образложение за состојбата и причините за сечењето на секое дрво.
