Кина планира да задржи цел за раст на бруто домашниот производ (БДП) од околу пет проценти и во следната година, според проценките на владини советници и економски аналитичари. Оваа стратегија бара значајна поддршка од страна на фискалната и монетарната политика, бидејќи властите се обидуваат да излезат од периодот на дефлација и да започнат нов петгодишен план со стабилен економски раст.
Целта од пет проценти е важна за опоравување на економијата по долготрајната криза во секторот на недвижности, слабата потрошувачка, прекумерниот индустриски капацитет и опаѓањето на инвестициите во инфраструктурата. Иако власта најавува поголем акцент на потрошувачката од домаќинствата и економското реструктурирање, овие промени ќе бараат време, па фокусот во краток рок повторно ќе биде на економските поттикнувања, пренесува Reuters.
Мнозинството советници сметаат дека целта за 2026 година треба да остане на околу пет проценти, додека помал број предлагаат опсег од 4,5 до 5 проценти. Крајната одлука ќе биде потврдена од страна на врвот на Партијата и државата на годишната Централна економска работна конференција, која ќе се одржи подоцна овој месец, а официјално ќе биде објавена на собраниската седница во март.
Советниците исто така предлагаат буџетскиот дефицит да остане најмалку четири проценти од БДП, слично на рекордниот ниво од оваа година. Аналитичарите од банката Citi предвидуваат дека централната банка ќе започне со намалување на каматните стапки веќе на почетокот на 2026 година, како и дека ќе продолжи постепената поддршка за секторот на недвижности. Владата ќе продолжи со субвенциите за замена на потрошувачките добра, а дел од средствата би можел да се пренасочи од стоки на услуги.
Според официјалните проекции, Кина ќе треба да постигне просечен годишен раст од околу 4,17 проценти во следната деценија за да го удвои БДП по глава на жител и да достигне статус на „умерено развиена земја“. Затоа, се очекува целите за раст во наредните години да бидат амбициозни. Новиот петгодишен план веројатно нема да има прецизна цел за раст за периодот 2026-2030, продолжувајќи ја практиката од претходниот план.
Кина веројатно ќе успее да ја постигне оваа година целта за раст од околу пет проценти благодарение на државните мерки и силниот извоз. Меѓутоа, неусогласеноста помеѓу понудата и побарувачката продолжува да се продлабочува, а индустриската производствена активност расте побрзо од потрошувачката. Аналитичарите предвидуваат дека дефлацијата на БДП ќе остане негативна и во 2026 година. Според проценките на банката Morgan Stanley, Кина би можела да излезе од дефлацијата дури во 2027 година.
Економистите одамна повикуваат на премин кон модел на раст базиран на потрошувачка, наместо на инвестиции и извоз. Кинеските власти сега ветуваат значително зголемување на уделот на потрошувачката од домаќинствата во следните пет години, која во моментов учествува со околу 40 проценти во БДП, во споредба со речиси 70 проценти во САД.
