Кинеската влада започна акција за сузбивање на дезинформациите кои ја погодуваат домашната автомобилска индустрија. Оваа иницијатива, која ќе трае три месеци, има за цел да се справи со растечката појава на лажни вести на интернет. Во борба против дезинформациите активно се вклучуваат и самите производители, како што се MG и BYD, кои нудат награди во милиони за информации кои би довеле до разоткривање на злонамерни профили.
Дезинформациите за бројни кинески производители на автомобили станаа вообичаена појава на локалните социјални мрежи, вклучувајќи ја и Douyin, кинеската верзија на TikTok. Конкуренцијата помеѓу производителите понекогаш се прелива и на социјалните мрежи, каде што се користат за напади на противниците. Како пример, порталот Nikkei Asia наведува инцидент од јули, кога компанијата Li Auto објави видео од судар помеѓу еден од нивните SUV-ови и камион на компанијата Dongfeng Liuzhou Motor. Иако SUV-от претрпе минимална штета, кабината на камионот беше целосно уништена, по што Dongfeng поднесе жалба, што резултираше со јавно извинување од Li Auto.
На почетокот на овој месец, кинеското Министерство за индустрија и информатичка технологија објави дека нивната нова кампања ќе се фокусира на злонамерните дезинформации во автомобилската индустрија. Тие нагласија дека ќе преземат мерки против “незаконските бизнис практики, прекумерното или лажно рекламирање и клеветата”.
Но, не само властите се вклучени во борбата. Производителите на автомобили активно се борат против лажните вести. MG нуди награди до 5 милиони јуани (околу 650.000 евра) за информации за злонамерни профили, додека BYD има сличен програм со награди од 50.000 до 5 милиони јуани. Важно е да се напомене дека дометот и влијанието на поединечни профили на социјалните мрежи не смеат да се потценат. Во 2023 година, еден инфлуенсер на Douyin објавуваше видеа во кои исмеваше возачите на електрични возила од еден кинески стартап. И покрај тоа што неговиот профил, кој имаше 5,4 милиони следбеници, беше суспендиран во јуни 2024, многумина сметаат дека штетата веќе била направена.
