Кинеските автомобили, кои до неодамна често беа предмет на потсмев на западните пазари, денес прераснаа во сериозна конкуренција за традиционалните производители. Најновите податоци од Генералната царинска управа на Кина покажуваат дека извозот на електрични возила во ноември пораснал за дури 87 проценти во споредба со истиот период лани.
Најголем пораст е забележан на пазарот во Мексико, кој во ноември се позиционира како водечка дестинација за кинеските електрични автомобили. Извозот кон оваа земја скокнал за неверојатни 2.367 проценти, со вкупно 19.344 испорачани возила. Иако официјалните податоци не прецизираат кои модели го носат растот, аналитичарите посочуваат дека BYD Dolphin Mini е меѓу најбараните електрични автомобили на мексиканскиот пазар.
Овој компактен електричен модел е долг околу 3,78 метри и е опремен со електромотор поставен напред, со моќност од 74 коњски сили и вртежен момент од 135 њутн-метри. Достапен е со две батериски опции, кои овозможуваат досег до 380 километри според NEDC стандардот.
По Мексико, како значајни пазари за кинеските електрични возила во ноември се издвојуваат Индонезија и Тајланд, кои увезле 17.503, односно 13.517 возила.
Европа под сè поголем притисок
На европскиот пазар, Обединетото Кралство забележало пораст од 113 проценти во увозот на кинески електрични автомобили во ноември, со 9.096 возила само во еден месец. Од почетокот на годината, на британските патишта пристигнале 121.555 кинески електрични автомобили, што претставува раст од 24 проценти во однос на минатата година.
Сепак, најголем влез на кинески електрични возила во Европа е регистриран во Белгија, каде во првите 11 месеци од годината биле увезени 195.309 возила. Иако ова претставува значителен обем, бројката е за 15 проценти помала во споредба со 2024 година.
Азија и Европа – клучни пазари
Азија и понатаму останува најголемиот пазар за кинеските електрични автомобили. Само во ноември, извозот кон азиските земји пораснал за 71 процент, достигнувајќи 110.061 возило. Следуваат Европа и Латинска Америка, вклучувајќи го и Карипскиот регион.
Вкупно гледано, азијските земји увезле речиси еден милион кинески електрични автомобили до ноември, додека Европа достигнала 604.105 увезени возила, што е 12 проценти повеќе од 2024 година. Токму овие бројки, според експертите, објаснуваат зошто европските производители и политички структури сè почесто реагираат со загриженост на кинеската експанзија.
