Кинеските марки во Европа веќе не се егзотика. Статистиките за 2025 година покажуваат дека нивниот пробив се претвора во сериозен пазарен помак. Според податоците на Dataforce, кои ги пренесува Reuters, до крајот на октомври во Европа се продадени 621.920 кинески автомобили, што претставува раст од дури 93 проценти во однос на минатата година. Со тоа, уделот на кинеските производители скокнува од претходните 3 на 5,6 проценти од пазарот во регионот кој вклучува ЕУ, Обединетото Кралство, Норвешка, Исланд и Швајцарија.
Апсолутниот победник е MG, кој од јануари до октомври испорачал повеќе од 250.000 возила и со тоа ја зацврстил позицијата на најпродаван кинески бренд во Европа. Следи BYD со повеќе од 137.000 продадени автомобили, додека зад нив се наоѓаат Chery (86.000) и Geely (53.000), пренесува Jutarnji.hr. Податоците потврдуваат она што се чувствува веќе месеци во пракса, а тоа е дека кинеските производители преземаат простор кој европските марки тешко го бранат, пред сè благодарение на агресивните цени, богата опрема и сè поквалитетни автомобили. MG стана своевиден “народен хит” во повеќе земји, додека BYD продолжува да го шири портфолиото и влегува во сегменти во кои европските модели тешко конкурираат.
Кинеските производители оваа година силно растат во низа европски земји, но резултатите драматично се разликуваат од пазар до пазар. Најдобар темпо бележат Шпанија, каде MG и BYD рушат рекорди и влегуваат меѓу најпродаваните електрични модели, и Обединетото Кралство, каде MG веќе е утврден како сериозен топ-10 бренд. Силен замах се забележува и во Италија, особено во сегментот на поволни SUV-ови, додека Франција и понатаму пружа отпор на кинеските марки, иако MG постепено ги освојува купците благодарение на агресивните цени.
Норвешка, пазар со речиси 100 проценти удел на електрични автомобили, покажува заситеност. Кинеските брендови таму стагнираат или паѓаат поради силната конкуренција од европските марки и Hyundai. Во Германија, најголемиот европски пазар, растот е изненадувачки слаб, бидејќи купците остануваат верни на домашните марки, а исчезнувањето на субвенциите дополнително го забави продажбата на BYD, Nio и Xpeng. Холандија, една од најинтересните земји за EV пазарот, исто така останува зад европскиот просек.
Вкупно гледано, кинеските брендови во Европа растат скоро двојно, но сликата е далеку од уедначена, од пазари кои пукаат по шавовите од побарувачката до оние кои и понатаму остануваат речиси непристапни.
