Изборот на модел и тип на автомобил се менува со годините. Но, кои автомобили доминираат меѓу постарите возачи, а кои меѓу помладите? Германскиот портал за споредба на цени на осигурување спроведе анонимна анализа на староста на корисниците кои ги споредувале полисите и склопиле осигурување, истражувајќи ја популарноста на 100 најчести модели меѓу различни старосни групи.
Според ова истражување, зад воланот на Мерцедес Б-класа најчесто се наоѓа лице постаро од 65 години. Дури 41,1% од сопствениците на Б-класата припаѓаат на оваа група. Наспроти тоа, само 1,9% од младите возачи поседуваат овој модел. Со просечна старост од 59,1 година, Мерцедес Б-класа има најстари возачи од сите 100 оценети модели.
На второто место се наоѓа Шкода Јети со просечна старост на возачите од 58,9 години и удел од 38,5% постара популација. Третото место го зазема Тоиота РАВ4 со просек од 57,1 година. Ауди Q3 и Опел Мерива исто така бележат удел на постари возачи поголем од 30%. Меѓу десетте модели со најстари возачи доминираат SUV-овите, кои постарите традиционално ги преферираат поради полесното влегување и попријатното седење. Затоа SUV возилата во просек имаат најстари возачи. Во помалите SUV модели, уделот на постарите возачи достигнува 25%. Од друга страна, само 11,9% од постарите лица возат автомобили компактен клас.
Во просек, компакната класа има најмлади сопственици – 46,5 години – помлади дури и од возачите на градски автомобили, чија просечна старост е 47,5 години. Просекот на сите сопственици на возила изнесува 48,3 години: 14,2% имаат 65 или повеќе години, а 11,2% 30 години или помалку.
Во согласност со финансиските можности, младите најчесто возат помали автомобили кои доминираат во нивниот топ 10 избор. Два модела на Сеат имаат најголем удел на млади возачи. Просечната старост на возачот на Сеат Леон изнесува 41,0 години, а на Ибиза 42,2 години, што ги става на првите две места. Следат БМВ Серии 1 и Фиат Гранде Пунто. Кај овие модели, уделот на возачи до 30 години е поголем од 20%, додека постарите од 65 години сочинуваат само околу 7%.
Ауди е особено застапен меѓу моделите што ги избираат помладите возачи, и тоа со моделите A3, A4 и A5. Ова се одразува и на просекот на марката: возачите на Сеат во анализата во просек имаат 43,5 години, а следат ги возачите на Ауди со 45,7 години. Просечната старост на возачите на Ауди A4 е исто така 45,7 години. За споредба, возачите на конкурентскиот Мерцедес C-класа во просек имаат 50,6 години. Марките со најстари возачи се Дачија и Порше, двете со просек од 53 години.
