Локалната власт игра клучна улога во секојдневниот живот на граѓаните, бидејќи е првиот и најблискиот контакт со институциите. Сепак, како што истакна Драган Ковачки, член на Извршниот комитет на ВМРО-ДПМНЕ, на митингот во Виница, за значајни промени е потребна силна поддршка од Владата. „Убеден сум дека сите сме свесни дека лично премиерот стои зад општинските проекти, зад вашите идеи, зад секој чекор што го правиме и ќе го правиме за подобар живот овде, во нашата Виница“, рече Ковачки.
Тој потсети на времето кога претходната влада на ДУИ и СДС беше блокатор на развојот на општините. „Со оваа Влада насекаде гледаме вистински промени – реконструирани улици, подобрена инфраструктура, поддршка за образованието и спортот, вложувања во младите и во стопанството. Ова не се само ветувања – ова се дела што веќе се гледаат и што секојдневно ќе стануваат сè повеќе“, додаде Ковачки.
Според него, само со „заедничка работа на градоначалникот, советниците и Владата – можеме да донесеме вистински промени, да реализираме проекти и да изградиме иднина со која сите ќе се гордееме“. Ковачки нагласи дека „нашата сила е во заедништвото“. Кога локалната власт и Владата работат заедно, кога премиерот е со нас, тогаш нема пречка што не може да се надмине.
„Со гласањето за 9 ја давате довербата на нашата локална власт, а таа доверба ќе ја донесе и Владата поблиску до вас. Довербата во градоначалникот и во советничката листа со број 9 е доверба и обврска тие да работат со поддршка од Владата и премиерот Христијан Мицкоски. Тоа заедништво ќе донесе нови патишта и улици, почисти и поуредени населби, подобри училишта, повеќе можности за младите, поголема поддршка за семејствата и за стопанството. Тоа заедништво ќе ја донесе иднината што ја заслужувате“, заклучи Ковачки.
