Ситуацијата во ООУ „Гоце Делчев“ во Штип е загрижувачка, особено кога станува збор за новозапишаните првачиња. Од вкупно 54 запишани ученици, само 24 се од македонска националност. Оваа бројка би можела да се намали, бидејќи учебната година сѐ уште не е започната, а двајца ученика веќе се испишале.
Директорот на училиштето, Зоран Митев, истакнува дека измените во Законот за основно образование не даваат очекувани резултати. Родителите, поради реонизацијата, често го менуваат местото на живеење за да запишат своите деца во други училишта. „Покрај извршената нова реонизација, состојбата не е променета во ООУ „Гоце Делчев“. Родителите најдоа нов модул, начин на запишување на учениците во друго училиште. Имено, си ги менуваат адресите, а оние кои не успеале да си ги променат адресите само со нотарски договор, без наемнина, ги запишуваат учениците во друго училиште. Имаме ние запишано 54 ученика, очекуваме да запишаме уште десетина, бидејќи дел од Ромската популација ги запишуваат децата во септември и октомври. Прописно ќе имаме формирано три паралелки, но имаме само 24 запишани македонски ученика. Еден денеска се испиша, уште еден ќе се испише,“ вели Митев.
Оваа појава во ООУ „Гоце Делчев“ не е нова и се повторува со години. Главниот проблем останува непочитувањето на реонизацијата. И покрај напорите за решавање на овие проблеми, конкретно решение сѐ уште не е пронајдено. Директорот Митев најави дека со почетокот на учебната година, училиштето ќе бара да се преиспитаат адресите на родителите, со цел да се потврди дали се почитува реонизацијата или се бара „дупка“ за да се заобиколи Законот. Паралелки со помал број ученици ќе се формираат и во подрачните училишта во село Шашаварлија и населбата Три Чешми.
