Со каква небесна радост се исполни денес светата Рајчичка обител! Крстовденската светлина ги облеа верните што во огромен број се собраа да се поклонат пред Чесниот и Животворен Крст, тоа оружје на победата и знаме на спасението. Во топлината на љубовта под Крстот и во благоуханието на молитвите, манастирот одекнуваше од славословијата на многубројни богољубиви срца.
По великото славословие на утрената богослужба, среде храмот победоносно беше издигнат Чесниот Крст, облеан со светлина и со молитвен трепет. Со умиление и благоговение, верните пристапуваа кон светото знамение на нашата победа, преклонувајќи колена и исповедајќи ја својата вера во распнатиот и воскреснат Господ. И додека траеше чинот на поклонение на Крстот, нашиот сакан старец, епископот Антаниски г. Партениј, со татковска љубов им делеше на сите украсени гранчиња од босилек – симбол на новиот живот и благодатта што изобилно извира од Крстот Христов.
Потоа, празничното славје беше крунисано со Божествена Евхаристија, со која чиноначалствуваше нашиот возљубен Старец, заедно со браќата свештенослужители и со дебарскиот свештеник о. Миле Ангелоски, и на којашто многубројни христокопнежливи души се соединија со Спасителот Христа. По светата Литургија, во манастирскиот двор пред храмот, Старецот го изврши чинот на водосветот, и ги ороси присутните со светата вода, за благослов и заштита за сите што со вера и надеж го прегрнуваат Крстот Господов. А како сведоштво на љубовта и одговорноста кон Рајчичкиот манастир, кум за следната година се пријави благочестивиот г. Владимир Стаиќ, предавајќи ја својата заложба во рацете на распнатата и воскресната Љубов.
Во својата празнична беседа, пак, Светиот Антаниски ги упати верните да ја живеат силата на Крстот како најсилен повик кон љубовта и жртвата, повикувајќи нè храбро да го носиме својот крст, да Го следиме Христа со полно срце и да бидеме исполнети со светината Негова.
ИЗВОР: bigorski.org.mk
