„Коалиција за заштита на децата“ објави дека до Министерството за образование и наука (МОН) и министерката Весна Јаневска доставила забелешки и барања поврзани со нацрт Националната стратегија за образование 2026–2032 и Акцискиот план 2026–2028.
Од Коалицијата тврдат дека во документите „експлицитно, но и суптилно“ се внесува, како што наведуваат, „ЛГБТИ+ терминологија и родова идеологија“, оценувајќи дека тоа претставува „индоктринација“, и бараат такви формулации да бидат отстранети. Во објавата тие ги повикуваат родителите и организациите кои ја делат нивната позиција да се приклучат и да испратат поддршка за нивните забелешки преку електронска пошта.
Од МОН претходно информираа дека новата Стратегија за образование 2026–2032 се изработува во соработка со повеќе институции и партнерски организации и дека постои простор за дополнителни предлози и подобрувања во процесот на подготовка.
