Политичката партија Левица изрази сериозни сомневања во врска со конкурсот за стручно оспособување и усовршување на офицери, кој, според нив, е оптоварен со корупција. Според нивните информации, голем број од кандидатите кои биле примени не успеале да ги поминат физичките проверки, но сепак добиле бодови кои им овозможиле да се квалификуваат.
„По реакциите на Левица, сѐ уште нема ни трага ни глас од Министерството за одбрана предводено од министерот на ДПМНЕ, Владо Мисајловски. Иако од Министерството тврдеа дека биле примени „најдобрите кандидати“, анализата на Левица покажа сериозни сомнежи за манипулација со резултатите“, велат од партијата. Тие истакнуваат дека бодовите од интервјуто биле прилагодувани со цел да се елиминираат најдобрите кандидати, иако тие имале предност според општиот успех, познавањето на англиски јазик и физичките проверки.
Левица дополнува дека постојат информации дека јавно прочитаните резултати од тестот по англиски јазик не соодветствуваат со официјално впишаните бодови на конечната листа. „Повторно напоменуваме дека интервјуто како најсубјективна етапа, никако не смее да биде пресудно за избор. Кои биле прашањата на интервјуто, дали биле унифицирани, и по кој основ еден кандидат добивал максимални 20 бода, а друг доволно ниски за да биде елиминиран?“ прашуваат од Левица.
Според нив, во Министерството за одбрана постојат три органи со надлежност да ги истражат овие неправилности: Секторот за внатрешна ревизија, Секторот за инспекција и Директоратот за безбедност и разузнавање. Тие имаат обврска да извршат темелна проверка и да утврдат одговорност.
„Доколку овие органи не постапат по допрен глас и не излезат со став пред јавноста, сериозно се доведува во прашање кредибилитетот на самото Министерство“, нагласуваат од Левица. Тие бараат надлежните органи да извршат надзор над сите записници од тестовите и да ги изнесат пред јавноста сите недоследности, со цел да се спречат понатамошни злоупотреби.
