Вчера, точно пет месеци по трагичниот настан во дискотеката „Пулс“ во Кочани, каде што животите на 62 млади луѓе згаснаа, полицијата, предводена од министерот Тошковски и ДПМНЕ, наместо да им понуди поддршка на семејствата кои секоја сабота протестираат за правда, се обиде да ги спречи граѓаните од други општини да влезат во Кочани и да им изразат солидарност. Оваа постапка предизвика остри реакции од страна на Левица, која ја оцени како срамна за секоја демократска држава.
„Да се забранува заедништво во тагата и уставно загарантираното право на мирен протест е врв на безобѕирноста и бездушноста“, изјавија од Левица. Според нив, демантот на Министерството за внатрешни работи е само обид за манипулација и извртување на вистината. Родителите на загинатите деца тврдат дека поддржувачите биле попречени да влезат во Кочани, а тоа го потврдуваат и видеоснимките достапни за јавноста.
„Наместо соочување со реалноста и спроведување на барањата на родителите, МВР се служи со празни формулации, надевајќи се дека ќе ја прикрие одговорноста“, додаваат од Левица. Тие истакнуваат дека полицијата, по налог на власта, се однесува како цензор, прогласувајќи дури и солидарноста за непожелна.
„Пет месеци по трагедијата, ниту една дивоградба не е урната, ниту една мерка за заштита на граѓаните не е преземена“, велат од Левица, нагласувајќи дека единственото што власта го прави е контролирање на наративот и шиканирање на секој кој ќе побара правда. Според нив, арогантноста и бруталноста на актуелната власт не изненадува.
„Премиерот Мицкоски отиде до таму што на родителите им побара цена за животите на нивните деца! Таквиот циничен однос само ја потврдува суштината на овој режим“, додаваат од Левица. Тие истакнуваат дека власта, наместо да извлече лекции од трагедијата, продолжува со истата ароганција и безобразие.
„Општеството тоне во апатија, страв и безнадежност, додека власта се обидува да го одржи статус квото“, велат од Левица, нагласувајќи дека ќе продолжат да стојат на страна на семејствата на загинатите деца и на нивната борба за вистинска и неселективна правда. Овој срам не смее да се заборави, а одговорност ќе мора да понесат сите, и политичка, институционална и морална, заклучуваат од Левица.
