Од 11 до 13 септември, Ѓорче Петров ќе биде домаќин на првото урбано издание на фестивалот „Еволуција на сонот“. Централниот општински парк ќе се претвори во сцена на современа култура, каде што музиката, уметноста и перформансите ќе се преплетуваат во единствено искуство.
Фестивалот, чиј основач и организатор е Весела Моловска, има цел да обедини различни култури и генерации преку урбана и меѓународна уметничка продукција. „Ова е повеќе од фестивал – тоа е културна револуција, место каде што слободата на изразување ќе добие нова димензија,“ вели Моловска.
Програмата започнува во четврток во 20:00 часот, во соработка со уметничкото движење „Паломарт“ од Неапол. Уметници од Португалија, Бразил и Италија ќе настапат со аудиовизуелни перформанси во живо, концерти, диџеј-сетови, инсталации и мурална уметност. Петокот ќе биде посветен на слободата на изразување преку танц, графити и урбани активности, со настапи на познати диџеи како Оки Доки, Дабл Г и Аце КН.
„Еволуција на сонот 2025“ ветува да биде урбано, музичко и уметничко доживување кое не само што ја промовира планетарната културна разноликост, туку и го поставува Ѓорче Петров на мапата на современите уметнички центри.
