Партијата Левица остро го осуди нападот на американската војска врз Венецуела, како и наводното киднапирање на демократски избраниот претседател Николас Мадуро од страна на американските специјални сили. Во соопштението, партијата нагласува дека „Овој кукавички чин претставува грубо кршење на меѓународното право на повеќе нивоа, при што нападот врз Венецуела е блатантен напад врз суверена држава, а киднапирањето на нејзиниот лидер е преседан и вовед во пракса на стратегија на заложништво во меѓународната политика.“
Левица истакнува дека нормализирањето на воените напади врз суверени земји и киднапирањето на демократски избрани лидери е неприфатливо. „Ниту еден дел од светот не може да биде безбеден доколку се продолжи со ваквите практики“, додаваат од партијата. Тие повикуваат на итен прекин на воените напади врз Венецуела и ослободување на Мадуро, истовремено барајќи од Министерството за надворешни работи на Република Македонија да го осуди овој акт на меѓународен тероризам.
„Инсистираме МНР да ја следи традицијата на македонската дипломатија, во која почитувањето на меѓународното право, демократскиот процес и државниот суверенитет се носечки и неповредливи вредности“, велат од Левица. Тие ја изразуваат својата поддршка на народот на Венецуела во овие тешки времиња, уверени дека ќе покажат единство и решителност во борбата против империјализмот.
На крајот, Левица им посакува на венецуелските воени сили и Обединетата социјалистичка партија истата решителност со која пред 23 години го спречија воениот удар врз Уго Чавез. „Уверени сме дека ниту еден подмолен акт нема да може да внесе сомнеж или паника помеѓу херојскиот народ на Венецуела. Левица и македонскиот народ секогаш ќе стојат на браникот на слободата и рамноправноста заедно со сите народи на светот“, заклучуваат од партијата.
