Министерот за социјална политика, демографија и млади, Фатмир Лимани, денеска официјално ги потпиша договорите за доделување грантови за развој на социјални услуги со претставници на девет општини, како дел од третиот јавен повик во рамки на Проектот за подобрување на социјалните услуги, поддржан од Светската банка.
Вкупно 26 апликации беа одобрени за финансирање, а денеска договори беа потпишани со општините Гевгелија, Охрид, Шуто Оризари, Арачиново, Карпош, Могила, Новаци, Ресен и Старо Нагоричани. Со ова, се отвора пат за воспоставување нови социјални услуги на локално ниво, вклучувајќи помош и нега во домот, дневни центри за стари лица и за лица со попреченост, со индивидуален третман.
„Овој повик е продолжение на заложбите за изградба на инклузивен и одржлив систем на социјална заштита, насочен кон реалните потреби на граѓаните“, изјави министерот Лимани.
Проектот досега поддржа 34 проекти во 43 општини преку првите два јавни повика, со ангажирање на повеќе од 460 негуватели и директна корист за над 1.600 граѓани.
„Овие проекти не само што обезбедуваат грижа за најранливите, туку ја отвораат и можноста за економска и социјална активација на долгорочно невработени, самохрани родители и корисници на гарантирана минимална помош“, нагласи министерот.
Проектот е дел од поширокиот процес на децентрализација и плурализација на социјалната заштита, со сè поголема улога на општините во креирање и имплементација на услуги според локалните потреби.
Министерството најави континуирана поддршка за сите општини и даватели на услуги кои покажуваат иницијатива и капацитет за унапредување на социјалната заштита во земјата.
