Системот за паметен надзор „Сејф сити“ за само неколку дена работа откри шокантни податоци за сообраќајната култура во земјата. Меѓу илјадниците регистрирани прекршоци, забележан е и екстремен случај — возач кој со 231 километар на час се движел по скопската обиколница. Информацијата ја потврдија началничката на Секторот за сообраќајни работи при МВР, Маја Арсовска Манов, и државниот советник во кабинетот на министерот, Владимир Велковски, во гостување на ТВ Телма.
Според нив, бројките што ги покажува системот недвосмислено ја потврдуваат потребата од негово целосно воведување, особено со оглед на загрижувачката состојба со безбедноста на патиштата.
Во првиот тест-ден, на 1 декември, „Безбеден град“ регистрирал вкупно 110.000 сообраќајни прекршоци за само 24 часа. Веќе следниот ден, на 2 декември, бројката паднала на 50.652 прекршоци — значително намалување што укажува дека системот делува превентивно и ги одвраќа возачите од несовесно однесување.
Од прекршоците регистрирани на 2 декември, најголем дел — 48.861 — се однесуваат на пречекорување на брзината. Покрај тоа, забележани се и 1.366 поминувања на црвено светло и 425 случаи на нерегистрирани возила.
Меѓу локациите со најмногу прекршоци се издвојуваат излезот од Скопје кон Тетово со околу 4.300 прекршоци за брзо возење, како и булевар „Никола Карев“, каде се регистрирани приближно 3.000 прекршоци.
