Според најновите информации од Автомото сојуз на Македонија, сообраќајот утрово се одвива во зимски услови, по претежно влажни коловози, со локални појави на магла и намалена видливост. Најкритично е на делницата Гевгелија – граничен премин Богородица, каде видливоста на моменти се намалува и до 60 метри, што значително го отежнува возењето.
Интензитетот на сообраќај надвор од градските средини е умерен, а на граничните премини засега нема подолги задржувања. Сепак, од АМСМ апелираат возачите да ја приспособат брзината на условите на патот, да држат поголемо растојание и да бидат особено внимателни низ клисурите, котлините и планинските превои каде постои ризик од одрони и лизгави делови.
Во сила останува и обврската за задолжителна зимска опрема во возилата, која важи до средината на март, без разлика на моменталното време. Дел од патиштата се под времен режим поради градежни активности и санации, што на одредени места предизвикува пренасочување или наизменично пропуштање на возилата. Дополнително, патот Охрид – Ресен преку Национален парк Галичица и оваа сезона останува затворен за сообраќај.
Надлежните препорачуваат внимателно и трпеливо возење, бидејќи комбинацијата од магла, влажни коловози и работи на пат може да создаде непредвидливи ситуации, особено во раните утрински и вечерните часови.
