Македонската православна црковна општина „Преподобна Параскева – Петка“ од Осло со голема духовна радост ја одбележа својата втора годишнина и го прослави патрониот празник – Света Петка. Настанот обедини бројни верници, пријатели и претставници на македонската заедница во Норвешка.
Свечената литургија ја отслужи Неговото Високопреосвештенство г. Пимен, Митрополит Европски, во сослужение со о. Жарко Ѓоргиески, кој во својата беседа потсети на значењето на верата, жртвата и заедништвото во животот на македонските православни христијани во дијаспората.
„Молитвата е мост што не поврзува – и со Бога, и едни со други, без оглед каде живееме,“ истакна Владиката Пимен, благословувајќи ја заедницата за понатамошен духовен напредок.
Посебна чест за присутните беше присуството на Бискупката Сунива од Ословската митрополија, која упати срдачен поздрав и ја истакна важноста на меѓусебното почитување и духовната соработка меѓу црковните заедници во Норвешка.
На литургијата присуствуваше и Оливера Трајковска, директорка на Управата за односи со верските заедници на Република Македонија, која ја поздрави заедницата и пренесе честитки од македонските институции.
Празничниот настан беше збогатен со настап на децата од Македонското училиште во Осло, кои со песни и рецитации на македонски јазик внесеа радост, насмевки и чувство на гордост кај присутните.
Прославата заврши со „трпеза на љубовта“, на која верниците споделија македонски јадења, песни и разговори во семејна атмосфера исполнета со благодарност и духовна сила.
Со оваа свеченост, македонската заедница во Норвешка уште еднаш покажа дека верата, културата и традицијата се темелот на нејзиното постоење и иднина, дури и илјадници километри далеку од татковината.
